„irdische“-Gedanken
Es pfifft e chüele Wing ganz liis.
Do fliegt es Blatt richtig Paradiis.
I nimm mis Örgeli, gang ganz schnäll
a d’Wärmi, do isch es gmüetlich gäll?!?
Es isch Zyt für es paar Gedanke z’teile
Es guets Wort cha o e huffe Wunde heile!
Mir mit «irdisch» mache das ganz pragmatisch,
mit euse Instrument in Liebi musikalisch!
So e Gruppe erläbt imene Johr ganz e huffe.
Für das muesch nid mol viel Bier go suffe!
Bim Reise vo Schuders bis uf Blaue
wirsch vom Diskutiere ganz e Schlaue!
Einisch si mir Richtig Bärneroberland.
Bis uf Gstaad, do gseht me allerhand.
Es lauft Radio Tell und s’wird mir heiss.
Ganz nach em Motto: «Ohne Fleiss kein Preis!»
Do darf i drum dr Haeme zitiere!
Er tuet immer wieder gärn philosophiere:
«Loset, liebi Kollege, löts la spriesse!
De cheu mir so richtig s’Musige gniesse!»
Drum haut dr Marco voll i Taschte.
I dr Harmoniewält het er ein uf em Chaschte.
E Fox! E Marsch! Do goht er uuuf….
und am Ändi chunnt e z’friedne Schnuuuf…..
Dr Andy het öbbe es Gnusch im Gring
und luegt erstuunt, ganz wie es Ching.
Het er s’denne glich no begriffe,
tuet er grad e neus Liedli pfiffe.
So läbt jede chli innere eigene Wält,
mit chli me oder weniger Gält.
Doch Läbesfreud wei mir schänke!
Drum wei mir an alli Läsende dänke.
Mir wünsche allne für die nöchschti Ziit
e friedlichi Wält ohni Hass und Striit!
Mir hoffe, dass me dr Chrieg gli het überwunde.
Denn gseie mir üs im 2024 für vieli schöni Stunde!